"أنا ما آكل شي… وما ينزل وزني."
من أكثر الجمل اللي توصلنا، وأغلب اللي يقولونها مشكلتهم مو قلة إرادة، المشكلة إن أجسامهم تتعامل مع الأكل بطريقة مختلفة، واسم هالحالة مقاومة الأنسولين.
في هذا المقال بتعرفين شنو هي بطريقة بسيطة، شنو أعراضها، ليش توقف نزول وزنك تحديداً، وشنو التعديلات اللي تقدرين تبدين فيها من اليوم.
شنو مقاومة الأنسولين؟
الأنسولين هرمون يطلع من البنكرياس بعد كل وجبة، وشغلته يدخّل السكر من الدم إلى الخلايا عشان يتحول لطاقة.
تخيليه مفتاح، والخلايا هي الأبواب.
ارتفاع الأنسولين يحدث بشكل يومي، خلف كل وجبة أو طعام يتم تناوله لسنوات طويلة (طالما الشخص عايش)، وهذا شيء طبيعي، فهو سيستم وهذه آلية عمله.
متى تقل الاستجابة ويصير المفاتيح ما تشتغل، كأننا غيّرنا القفل؟ (يعني تحدث مقاومة الأنسولين) لما يصير فيه لخبطة أو عدم توازن، اللي يكون على أحد هذي الأشكال:
- تناول أكل وايد أكثر من احتياج الشخص
- تناول أكل بعدد مرات أكثر مما الجسم يحتاج
- كثرة تناول الطعام الغير ملائم
- قلة الحركة أو عدمها بالمرة (وهي أحد أهم الطرق لتصريف الأنسولين والسكر في الدم بشكل جيد)
- ممارسة عادات تكون عكس دورة الجسم الطبيعية (مثل السهر والنوم الصبح أو عدم النوم الكافي)
هذي كلها تؤدي إلى ضعف الاستجابة، وتصير الخلايا ما تفتح وتقاوم. وبهذا الوقت الجسم يبدأ يعالج المشكلة بطريقته الخاصة، وهي إنه يفرز أنسولين أكثر (كأنه يرسل مفاتيح أكثر للخلية اعتقاداً منه إن المفتاح عطلان).
والنتيجة؟ أنسولين مرتفع أغلب اليوم. وهذي نقطة مهمة، لأن الأنسولين المرتفع يخلي الجسم بوضع تخزين، مو وضع حرق.
7 أعراض لمقاومة الأنسولين عند النساء
مو ضروري تجتمع كلها، بس لو لقيتي ثلاث أو أكثر تنطبق عليك، تستاهل تراجعين طبيبك:
1. نعاس شديد بعد الأكل
خاصة بعد وجبة فيها نشويات، تحسين إنك تبين تنامين فوراً.
2. جوع بعد ساعتين من وجبة كاملة
مع إنك أكلتي كفاية.
3. رغبة قوية بالحلو
طول اليوم أو وقت العصر أو بعد العشا.
4. دهون تتجمع بمنطقة البطن تحديداً
حتى لو باقي جسمك تخزين الدهون فيه طبيعي.
5. ثبات الوزن
مع إنك قللتي أكل ومشيتي.
6. تعب عام وقلة تركيز
ودوخة بسيطة لو تأخرتي عن وجبة.
7. تغيّرات جلدية
مثل اسمرار وخشونة بمنطقة الرقبة أو تحت الإبط (الشواك الأسود).
وأحياناً تجي معها دورة غير منتظمة أو زيادة شعر، وهنا تكون مرتبطة بتكيس المبايض.
ليش الرجيم العادي ما يشتغل مع مقاومة الأنسولين؟
عشان الرجيم التقليدي يركز على شي واحد: قللي أكل.
وهذا يحل نص المعادلة بس. الجزء الثاني هو كم مرة ترفعين الأنسولين باليوم، وشنو نوع الأكل اللي يرفعه بشكل حاد.
الرجيم القاسي يسوي عكس المطلوب: تجويع شديد يؤدي لجوع لا يتحمل، فانهيار على الحلويات، فارتفاع حاد بالأنسولين، فإحساس بالذنب يؤدي لتجويع أقسى.
والدورة تتكرر، وكل مرة تخرجين منها بثقة أقل بنفسك. المشكلة مو فيك، المشكلة إن الطريقة نفسها ما تناسب حالتك.
علاقة مقاومة الأنسولين بتكيس المبايض
كثير من النساء المصابات بتكيس المبايض عندهن مقاومة أنسولين بنفس الوقت، والاثنين يغذون بعض: الأنسولين المرتفع يزيد اضطراب الهرمونات، واضطراب الهرمونات يصعّب نزول الوزن، وزيادة الوزن ترفع الأنسولين أكثر.
الخبر الحلو إن التعديل الغذائي يخدم الحالتين مع بعض، لأن نقطة البداية وحدة.
5 تعديلات غذائية تبدئين فيها اليوم
هذي خطوات عامة تقدرين تطبقينها بدون أي نظام:
1. بروتين بكل وجبة
بيض، دجاج، سمك، لبن، عدس. البروتين يقلل الارتفاع الحاد بالسكر ويشبّعك فترة أطول.
2. رتبي ترتيب الأكل بالصحن
ابدي بالخضار، بعدها البروتين، وآخر شي النشويات. نفس الوجبة بترتيب مختلف تعطي استجابة أهدأ.
3. لا تاكلين النشويات لحالها
التمر لحاله أو الخبز لحاله يرفع بسرعة. ضيفي معه بروتين أو دهن صحي، مثل تمر مع لوز، أو خبز مع جبن.
4. امشي 10 إلى 15 دقيقة بعد الأكل
من أبسط الأشياء وأكثرها فعالية، تساعد العضلات تسحب السكر بدون حاجة لأنسولين إضافي.
5. نظّمي نومك
قلة النوم ترفع مقاومة الأنسولين بشكل مباشر. النوم مو رفاهية لكل الحالات وبالأخص مع هذه الحالة، هو جزء من العلاج.
متى تراجعين الطبيب؟
لو الأعراض تنطبق عليك، اطلبي من طبيبك تحاليل مثل: سكر صائم، أنسولين صائم، والهيموجلوبين السكري (HbA1c)، مع فحص الغدة الدرقية إذا فيه أعراض مصاحبة.
التحاليل تعطيك وضوح، والتشخيص شغل الطبيب مو شغل الإنترنت. المقال هنا للتوعية الغذائية بس.
أسئلة شائعة
هل مقاومة الأنسولين تعني إني مصابة بالسكري؟
لا. هي حالة تسبق السكري من النوع الثاني وتزيد احتمال الإصابة به، بس التعديل الغذائي المبكر يفرق كثير.
كم وقت أحتاج لأشوف نتيجة؟
أغلب اللي يعدّلون نوع أكلهم يلاحظون فرق بالطاقة والانتفاخ وقلة النهم خلال أسبوعين، والوزن يتحرك بعدها بشكل أثبت.
لازم أوقف النشويات نهائياً؟
لا، والتوقف الكامل غالباً يفشل. المطلوب نوع أفضل من النشويات وكمية مدروسة وترتيب صح مع باقي الوجبة.
هل ممكن تكون عندي مقاومة أنسولين وأنا وزني طبيعي؟
نعم، ممكن. الوزن مو المؤشر الوحيد.
الخطوة الجاية
إذا قريتي المقال وحسيتي إن الكلام يوصف وضعك، فالنقطة المهمة إنك عرفتي الحين شنو السبب، وهذي أصعب خطوة.
نظام مقاومة الأنسولين مبني بالضبط على هالفكرة: أكل يهدّي الأنسولين ويرجّع جسمك لوضع الحرق، بدون تجويع ولا حرمان.
اعرفي تفاصيل نظام مقاومة الأنسولين، 27 ديناراً ←
وهالأسبوع فقط: تقدرين تضيفين كورس التكميم الطبيعي بـ12 ديناراً بدل 24 عند إضافة نظام مقاومة الأنسولين لسلتك، والعرض ينتهي السبت 19 سبتمبر الساعة 12:00 صباحاً.
ولو عندك تكيس مبايض مع الأعراض، شوفي نظام التكيس لأنه مبني على نفس الأساس بتعديلات هرمونية إضافية.
المحتوى في هذا المقال للتوعية الغذائية فقط، ولا يغني عن استشارة الطبيب أو إجراء التحاليل اللازمة.